Aisha Tukur
Nigeria President Bola Tinubu don approve di appointment of three directors-general for three agencies plus one special adviser on Public Communications and Media.
Di new appointees na Olawale Olopade as Director-General, National Sports Commission, Abisoye Fagade as Director-General, National Institute for Hospitality and Tourism and Adebowale Adedokun as Director-General, Bureau of Public Procurement .
Di president also appoint Daniel Bwala as di Special Adviser, Media and Public Communications for State House.
Di presidency announce di new appointments inside one statement wey Special Adviser to di President Information and Strategy, Bayo Onanuga, bin sign.
Di new DG of National Sports Commission, Olopade, na sports administrator wit many years of experience for di sector.
Im bin serve as commissioner of youth and sports for Ogun state and chairman of di local organising committee of di 2024 National Sports Festival.
Di National Institute for Hospitality and Tourism new leader, Abisoye Fagade, na marketing communication professional.
Fagade na di founder and managing director of Sodium Brand Solutions.
Adedokun, new oga of Bureau of Public Procurement, bin be di director of Research/Training and Strategic Planning for di bureau before im appointment.
Di Special Adviser on Public Communications and Media, Daniel Bwala na lawyer and popular public affairs analyst.
Who be Daniel Bwala
Dr Daniel Bwala, na popular politician and lawyer for Nigerian.
Dem born am for Born state wia im study from primary school to university level.
Bwala graduate from University of Maiduguri in 2006, and attend Nigerian Law School in Bwari, Abuja.
E don work wit Law Firm of J-K Gadzama & Partners LLP, one of di leading Law Firms in Nigeria for five years, until 2013 wen im leave to go set up im own law firm Bwala & Co.
In 2008, e participate as Observer/Shadow Judge for di International Negotiation Competition (INC) University of Westminster, London, UK and in 2009, e become Nigerian National representative to International Negotiation Competition (INC) US.A till date.
In 2014, Bwala earn Master of Laws (LLM) in International Business Law from Coventry University and become member of di english bar as barrister by di Honourable Society of Lincolns Inn.
Bwala dey happily married to Diana Bwala, veterinary Doctor and lecturer for university of Maiduguri and dem get two pikin, Faith and Ethan.
In 2022, presidential candidate of di People Democratic Party (PDP) and former vice president of Nigeria, Atiku Abubakar appoint Daniel Bwala as tok-tok pesin to di presidential candidate of di PDP for di 2023 presidential election.
In july 2024, Bwala tok say im don comot from PDP to go join di rulling party All Progressives Congress
